ਗੁਰਦਾਸਪੁਰ, 2 ਜੁਲਾਈ (ਸਰਬਜੀਤ)–ਥਾਣਾ ਦੀਨਾਨਗਰ ਦੀ ਪੁਲਸ ਵੱਲੋਂ ਪਾਕਿਸਤਾਨ ਤੋਂ ਹੈਰੋਇਨ ਮੰਗਵਾ ਕੇ ਅਗਾਂਹ ਸਪਲਾਈ ਕਰਨ ਵਾਲੇ ਚਾਰ ਸਮੱਗਲਰਾਂ ਨੂੰ 16 ਕਿਲੋ 800 ਗ੍ਰਾਮ ਹੈਰੋਇਨ ਸਮੇਤ ਗਿ੍ਰਫਤਾਰ ਕੀਤਾ ਗਿਆ ਹੈ। ਜਦੋਂ ਇੱਕ ਮੁੱਖ ਸਰਗਨਾ ਅਜੇ ਪੁਲਸ ਦੀ ਗਿ੍ਰਫਤ ਤੋਂ ਬਾਹਰ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸਮੱਗਰ ਤੀਸਰੀ ਵਾਰ ਹੈਰੋਇਨ ਲੈ ਕੇ ਵਾਪਸ ਜਾ ਰਹੇ ਸਨ।
ਦੀਨਾਨਗਰ ਥਾਣੇ ਵਿਖੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦੇ ਹੋਏ ਐਸ.ਐਸ.ਪੀ ਗੁਰਦਾਸਪੁਰ ਹਰਜੀਤ ਸਿੰਘ ਨੇ ਦੱਸਿਆ ਕਿ 30 ਜੂਨ ਨੂੰ ਰਾਤ ਕਰੀਬ ਸਾਢੇ 10 ਵਜੇ ਥਾਣਾ ਦੀਨਾਨਗਰ ਦੇ ਮੁੱਖੀ ਕਪਿਲ ਕੌਸਲ ਵੱਲੋਂ ਪੁਲਿਸ ਪਾਰਟੀ ਸਮੇਤ ਸਪੈਸ਼ਲ ਵਹੀਕਲ ਚੈਕਿੰਗ ਦੇ ਸਬੰਧ ਵਿੱਚ ਨਾਕਾ ਨੈਸ਼ਨਲ ਹਾਈਵੇ ਸ਼ੂਗਰ ਮਿੱਲ ਪਨਿਆੜ ਮੌਜੂਦ ਸੀ । ਇਸੇ ਦੌਰਾਨ ਮੁੱਖਬਰ ਖਾਸ ਨੇ ਇਤਲਾਹ ਦਿੱਤੀ ਕਿ ਮਲਕੀਤ ਸਿੰਘ ਪੁੱਤਰ ਸੁਰਜੀਤ ਸਿੰਘ ਵਾਸੀ ਚੀਮਾ ਕਲਾਂ ਥਾਣਾ ਸਰਾਏ ਅਮਾਨਤ ਖਾਂ ਜਿਲਾ ਤਰਨਤਾਰਨ ਜਿਸਦੇ ਸਬੰਧ ਪਾਕਿਸਤਾਨ ਵਿੱਚ ਬੈਠੇ ਸਮਗਲਰਾਂ ਨਾਲ ਹਨ ਤੇ ਇਹ ਵਾਇਆ ਜੰਮੂ ਕਸ਼ਮੀਰ ਆਪਣੇ ਬੰਦੇ ਭੇਜ ਕੇ ਭਾਰੀ ਮਾਤਰਾ ਵਿੱਚ ਹੈਰੋਇਨ ਮੰਗਵਾ ਕੇ ਅੱਗੇ ਵੇਚਣ ਦਾ ਧੰਦਾ ਕਰਦਾ ਹੈ। ਇਸਨੇ ਅੱਜ ਵੀ ਗੁਰਦਿੱਤ ਸਿੰਘ ਉਰਫ ਗਿੱਤਾ ਪੁੱਤਰ ਤਰਸੇਮ ਸਿੰਘ ਅਤੇ ਭੋਲਾ ਸਿੰਘ ਪੁੱਤਰ ਸੁੱਚਾ ਸਿੰਘ ਵਾਸੀਆਂਨ ਚੀਮਾ ਕਲਾਂ ਨੂੰ ਇਨੋਵਾ ਕਰਿਸਟਾ ’ਤੇ ਅਤੇ ਮਨਜਿੰਦਰ ਸਿੰਘ ਉਰਫ ਮੰਨਾ ਪੁੱਤਰ ਸੁਰਮੁੱਖ ਸਿੰਘ ਅਤੇ ਕੁਲਦੀਪ ਸਿੰਘ ਉਰਫ ਕੀਪਾ ਪੁੱਤਰ ਪ੍ਰੇਮ ਸਿੰਘ ਵਾਸੀ ਕਾਜੀ ਕੋਟ ਰੋਡ ਤਰਨਤਾਰਨ ਜੋ ਕਿ ਇਨੋਵਾ ਗੱਡੀ ’ਤੇ ਜੰਮੂ ਵੱਲ ਹੈਰੋਇਨ ਲੈਣ ਭੇਜਿਆ ਹੋਇਆ ਹੈ। ਉੱਕਤ ਦੋਸੀ ਜੰਮੂ ਵਲੋਂ ਆਪਣੀਆਂ ਗੱਡੀਆਂ ਵਿੱਚ ਭਾਰੀ ਮਾਤਰਾ ਵਿੱਚ ਹੈਰੋਇਨ ਲੈ ਕਿ ਵਾਪਿਸ ਇਧਰ ਨੂੰ ਆ ਰਹੇ ਹਨ। ਸੂਚਨਾ ਪੱਕੀ ਹੋਣ ਤੋਂ ਬਾਅਦ ਨਾਕਾਬੰਦੀ ਹੋਰ ਤੇਜ ਕਰ ਦਿੱਤੀ ਗਈ। ਇਨਾਂ ਸਮੱਗਲਰਾਂ ਨੂੰ ਫੜ ਲਈ 4 ਮੈਂਬਰੀ ਕਮੇਟੀ ਦਾ ਗਠਨ ਕੀਤਾ ਗਿਆ। ਜਿਨਾਂ ਵਿੱਚ ਐਸ.ਪੀ ਇੰਵੈਸਟੀਗੇਸ਼ਨ ਡਾ. ਮੁਕੇਸ਼, ਡੀ.ਐਸ.ਪੀ ਗੁਰਿੰਦਰਪਾਲ ਸਿੰਘ ਨਾਗਰਾ ਕਲਾਨੌਰ, ਇੰਸਪੈਕਟਰ ਕੁਲਵੰਤ ਸਿੰਘ ਕਲਾਨੌਰ, ਥਾਣਾ ਮੁੱਖੀ ਦੀਨਾਨਗਰ ਕਪਿਲ ਕੌਸ਼ਲ ਸ਼ਾਮਲ ਸਨ।
ਉਨਾਂ ਦੱਸਿਆ ਕਿ ਇਸੇ ਦੌਰਾਨ ਜੰਮੂ ਵਾਲੇ ਪਾਸੇ ਤੋਂ ਦੋ ਇਨੋਵਾ ਗੱਡੀਆ ਰਹੀਆ ਸਨ। ਜਿਨਾਂ ਨੂੰ ਰੋਕਿਆ ਗਿਆ। ਗੱਡੀਆਂ ਦੀ ਤਲਾਸ਼ੀ ਲੈਣ ’ਤੇ ਇਸ ਵਿੱਚੋਂ 16 ਕਿਲੋ 800 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ ਗਈ। ਉਨਾਂ ਦੱਸਿਆ ਕਿ ਪੁੱਛਗਿੱਛ ਦੌਰਾਨ ਪਤਾ ਲੱਗਾ ਹੈ ਕਿ ਇਹ ਸਮੱਗਲਰ ਪਹਿਲੇ ਵੀ 2 ਵਾਰ ਹੈਰੋਇਨ ਦੀ ਖੇਪ ਲਿਆ ਚੁੱਕੇ ਸਨ। ਸਮੱਗਲਰਾਂ ਨੇ ਦੱਸਿਆ ਕਿ ਇਹ ਖੇਪ ਉਨਾਂ ਦੇ ਪਿੰਡ ’ਚ ਰਹਿਣ ਵਾਲੇ ਮੁੱਖ ਸਰਗਨਾ ਮਲਕੀਤ ਸਿੰਘ ਨੂੰ ਦੇਣੀ ਸੀ।
