ਅਰਬਾਂ ਰੁਪਏ ਕਾਲਾ ਧਨ ਵਿਦੇਸ਼ ਭੇਜਣ ਬਦਲੇ ਤੋਮਰ ਨੂੰ ਕੇਂਦਰੀ ਮੰਤਰੀ ਮੰਡਲ ‘ਚੋਂ ਬਰਖ਼ਾਸਤ ਕੀਤਾ ਜਾਵੇ ਅਤੇ ਉਸ ਖਿਲਾਫ ਸੁਪਰੀਮ ਕੋਰਟ ਦੀ ਨਿਗਰਾਨੀ ਹੇਠ ਜਾਂਚ ਕਰਵਾਈ ਜਾਵੇ -ਸੁਖਦਰਸ਼ਨ ਨੱਤ

ਇਸ ਗੰਭੀਰ ਮੁੱਦੇ ‘ਤੇ ਐਸਜੀਪੀਸੀ ਸਮੇਤ ਤਮਾਮ ਸਿਆਸੀ ਪਾਰਟੀਆਂ ਵੱਲੋਂ ਧਾਰੀ ਸਾਜ਼ਿਸ਼ੀ ਚੁੱਪ ਉਤੇ ਵੀ ਸਵਾਲ ਉਠਾਇਆ ਗਿਆ

ਗੁਰਧਾਮਾਂ ਦੀ ਦੁਰਵਰਤੋ ਕਰਕੇ ਕਾਲੇ ਧੰਦਾ ਕਰਨ ਬਦਲੇ ਮਨਜਿੰਦਰ ਸਿਰਸਾ ਖਿਲਾਫ ਕੇਸ ਦਰਜ ਹੋਵੇ ਅਤੇ ਧਰਮ ਦੀ ਸ਼ਰਮਨਾਕ ਬੇਅਦਬੀ ਬਦਲੇ ਸ਼੍ਰੀ ਆਕਾਲ ਤਖਤ ਦੇ ਜਥੇਦਾਰ ਸਿਰਸਾ ਨੂੰ ਤਲਬ ਕਰਨ

ਮਾਨਸਾ, ਗੁਰਦਾਸਪੁਰ, 24 ਨਵੰਬਰ (ਸਰਬਜੀਤ ਸਿੰਘ)– ਸੀਪੀਆਈ (ਐਮ ਐਲ) ਲਿਬਰੇਸ਼ਨ ਨੇ ਦੇਸ਼ ਦੇ ਰਾਸ਼ਟਰਪਤੀ ਤੋਂ ਮੰਗ ਕੀਤੀ ਹੈ ਕਿ ਪੰਜਾਬੀ ਮੂਲ ਦੇ ਇਕ ਕੈਨੇਡੀਅਨ ਨਾਗਰਿਕ ਜਗਮਨਦੀਪ ਸਿੰਘ ਵਲੋਂ ਕੇਂਦਰੀ ਕੈਬਨਿਟ ਮੰਤਰੀ ਨਰਿੰਦਰ ਤੋਮਰ ਅਤੇ ਉਸ ਦੇ ਪਰਿਵਾਰ ਵਲੋਂ ਉਤੇ ਸਬੂਤਾਂ ਸਹਿਤ ਲਾਏ ਗਏ ਹਜ਼ਾਰਾਂ ਕਰੋੜ ਰੁਪਏ ਦੇ ਧਨ ਨੂੰ ਗੈਰ ਕਾਨੂੰਨੀ ਤੌਰ ‘ਤੇ ਵਿਦੇਸ਼ਾਂ ਵਿਚ ਲਿਜਾਣ ਅਤੇ ਪੰਜਾਬ ਦੀ ਇਕ ਜੇਲ ਵਿਚੋਂ ਭਗੌੜੇ ਹੋਣ ਪਿਛੋਂ ਜਗਮਨਦੀਪ ਨੂੰ ਮਹੀਨਿਆਂ ਬੱਧੀ ਅਪਣੇ ਸਰਕਾਰੀ ਨਿਵਾਸ ਵਿਚ ਪਨਾਹ ਦੇਣ ਦੇ ਦੋਸ਼ਾਂ ਦੇ ਮੱਦੇਨਜ਼ਰ ਤੋਮਰ ਨੂੰ ਤੁਰੰਤ ਕੇਂਦਰੀ ਮੰਤਰੀ ਮੰਡਲ ਵਿਚੋਂ ਬਰਖ਼ਾਸਤ ਕੀਤਾ ਜਾਵੇ ਅਤੇ ਇਸ ਸਮੁੱਚੇ ਕਾਲੇ ਧੰਦੇ ਦੀ ਸੁਪਰੀਮ ਕੋਰਟ ਦੀ ਨਿਗਰਾਨੀ ਹੇਠ ਸਮਾਂ ਬੱਧ ਜਾਂਚ ਕਰਵਾਈ ਜਾਵੇ।
ਲਿਬਰੇਸ਼ਨ ਦੇ ਸੂਬਾਈ ਬੁਲਾਰੇ ਕਾਮਰੇਡ ਸੁਖਦਰਸ਼ਨ ਸਿੰਘ ਨੱਤ ਵਲੋਂ ਇਥੋਂ ਜਾਰੀ‌ ਇਕ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਜਿਥੇ ਪਹਿਲਾਂ ਜਗਮਨਦੀਪ ਤੇ ਨਰਿੰਦਰ ਤੋਮਰ ਦੇ ਬੇਟੇ ਦੇਵਿੰਦਰ ਤੋਮਰ ਦਰਮਿਆਨ 500 ਕਰੋੜ ਰੁਪਏ ਦੇ ਕਾਲੇ ਧਨ ਦੇ ਲੈਣ ਦੇਣ ਬਾਬਤ ਇਕ ਵੀਡਿਓ ਵਾਇਰਲ ਹੋਈ ਸੀ, ਜਿਸ ਨੂੰ ਤੋਮਰ ਅਤੇ ਬੀਜੇਪੀ ਲੀਡਰਸ਼ਿਪ ਵਲੋਂ ਰੁਟੀਨ ਵਿਚ “ਫੇਕ” ਕਰਾਰ ਦੇ ਕੇ ਰਫਾ ਦਫਾ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਪਰ ਛੇਤੀ ਹੀ ਖੁਦ ਜਗਮਨਦੀਪ ਨੇ ਸੋਸ਼ਲ ਮੀਡੀਆ ‘ਤੇ ਸਾਹਮਣੇ ਆ ਕੇ ਨਾ ਸਿਰਫ ਇਸ ਵੀਡੀਓ ਦੀ ਪੁਸ਼ਟੀ ਕੀਤੀ, ਬਲਕਿ ਦਸਿਆ ਕਿ ਕਿਵੇਂ ਖੁਦ ਉਸ ਦੇ ਜ਼ਰੀਏ ਤੋਮਰ ਪਰਿਵਾਰ ਵਲੋ ਭ੍ਰਿਸ਼ਟਾਚਾਰ ਜ਼ਰੀਏ ਲੁੱਟਿਆ ਦੇਸ਼ ਦਾ ਦਸ ਹਜ਼ਾਰ ਕਰੋੜ ਰੁਪਏ ਤੋਂ ਵਧੇਰੇ ਧਨ ਕਨੇਡਾ ਤੇ ਹੋਰਨਾਂ ਦੇਸ਼ਾਂ ਵਿਚ ਲਿਜਾਇਆ ਗਿਆ ਅਤੇ ਵੱਖ ਵੱਖ ਕਾਰੋਬਾਰਾਂ ਵਿਚ ਲਾਇਆ ਗਿਆ ਹੈ। ਜਗਮਨਦੀਪ ਨੇ ਤੋਮਰ ਪਰਿਵਾਰ ਵਲੋਂ ਇਹ ਕਾਲਾ ਧਨ ਵਿਦੇਸ਼ ਪਹੁੰਚਾਉਣ ਅਤੇ ਸਿਆਸੀ ਸੌਦੇਬਾਜ਼ੀ ਲਈ ਵਿਦੇਸ਼ੋਂ ਮੁੜ ਦੇਸ਼ ਲਿਆਉਣ ਵਿਚ ਦਿੱਲੀ ਗੁਰਦੁਆਰਾ ਪ੍ਰਬੰਧਕੀ ਕਮੇਟੀ ਦੇ ਪ੍ਰਧਾਨ ਤੇ ਹੁਣ ਬੀਜੇਪੀ ਵਿਚ ਸ਼ਾਮਲ ਹੋ ਚੁੱਕੇ ਅਕਾਲੀ ਨੇਤਾ ਮਨਜਿੰਦਰ ਸਿੰਘ ਸਿਰਸਾ ਵਲੋਂ ਗੁਰਦੁਆਰਾ ਕਮੇਟੀ ਤੇ ਗੁਰੂ ਦੀ ਗੋਲਕ ਦੀ ਕੀਤੀ ਗਈ ਸ਼ਰਮਨਾਕ ਦੁਰਵਰਤੋਂ ਦਾ ਵੀ ਖੁੱਲ ਕੇ ਵੇਰਵਾ ਦਿੱਤਾ ਹੈ। ਇਸ ਕਰਕੇ ਅਸੀਂ ਮੰਗ ਕਰਦੇ ਹਾਂ ਕਿ ਮਨਜਿੰਦਰ ਸਿਰਸਾ ਖ਼ਿਲਾਫ਼ ਵੀ ਨਾ ਸਿਰਫ ਹਵਾਲਾ ਕਾਰੋਬਾਰ ਕਰਨ ਬਦਲੇ ਫੇਰਾ ਐਕਟ ਤਹਿਤ ਕੇਸ ਦਰਜ ਕੀਤਾ ਜਾਵੇ, ਬਲਕਿ ਗੁਰੂ ਘਰ ਦੀ ਘਿਨਾਉਣੀ ਬੇਅਦਬੀ ਕਰਨ ਬਦਲੇ ਜਥੇਦਾਰ ਸ਼੍ਰੀ ਆਕਾਲ ਤਖਤ ਸਾਹਿਬ ਵੀ ਸਿਰਸਾ ਨੂੰ ਤੁਰੰਤ ਤਲਬ ਕਰਨ ਅਤੇ ਪੰਥ ਵਿਚੋਂ ਛੇਕਣ ਵਰਗੀ ਸਖਤ ਸਜ਼ਾ ਦੇਣ। ਬਿਆਨ ਵਿਚ ਇਸ ਗੰਭੀਰ ਮੁੱਦੇ ‘ਤੇ ਐਸਜੀਪੀਸੀ ਸਮੇਤ ਤਮਾਮ ਸਿਆਸੀ ਪਾਰਟੀਆਂ ਵੱਲੋਂ ਧਾਰੀ ਸਾਜ਼ਿਸ਼ੀ ਚੁੱਪ ਉਤੇ ਵੀ ਸਵਾਲ ਉਠਾਇਆ ਗਿਆ ਹੈ।