ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਸ਼ਹੀਦੀ ਦਿਵਸ ਮੌਕੇ ਲਿਆ ਪ੍ਰਣ
ਪੁਲਸ ਪ੍ਰਸ਼ਾਸਨ ਨਸ਼ੇ ਵੇਚਣ ਵਾਲਿਆਂ ਵਿਰੁੱਧ ਨਹੀਂ ਕਰ ਰਿਹਾ ਕੋਈ ਐਕਸ਼ਨ-ਰਾਣਾ, ਝੋਟਾ
ਮਾਨਸਾ, ਗੁਰਦਾਸਪੁਰ 17 ਨਵੰਬਰ (ਸਰਬਜੀਤ ਸਿੰਘ)- ਨਸ਼ਾ ਵਿਰੋਧੀ ਐਕਸ਼ਨ ਕਮੇਟੀ ਵੱਲ੍ਵੋਂ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਸ਼ਹੀਦੀ ਦਿਹਾੜੇ ਮੌਕੇ ਮਾਨਸਾ ਜ਼ਿਲ੍ਹੇ ਤੋਂ ਮੁੜ ਨਸ਼ਿਆਂ ਵਿਰੁੱਧ ਫੈਸਲਾਕੁੰਨ ਲੜਾਈ ਵਿਢਣ ਦਾ ਐਲਾਨ ਕੀਤਾ ਹੈ,ਕਮੇਟੀ ਨੇ ਦੋਸ਼ ਲਾਇਆ ਗਿਆ ਹੈ ਕਿ ਮਾਨਸਾ ਸ਼ਹਿਰ ਅੰਦਰ ਮੁੜ ਸ਼ਰੇਆਮ ਨਸ਼ਾਂ ਵੇਚਿਆ ਜਾ ਰਿਹਾ ਹੈ,ਪਰ ਪੁਲਸ ਪ੍ਰਸ਼ਾਸਨ ਵੱਲੋਂ ਕਸੂਰਵਾਰ ਦੁਕਾਨਦਾਰ ਖਿਲਾਫ ਕੋਈ ਵੀ ਕਾਰਵਾਈ ਨਹੀਂ ਕੀਤੀ ਜਾ ਰਹੀ, ਜਿਸ ਕਾਰਨ ਐਕਸ਼ਨ ਕਮੇਟੀ ਵੱਲ੍ਵੋਂ ਸ਼ਹਿਰ ਦੇ ਮਹੱਲਿਆ ਚ ਕਮੇਟੀਆਂ ਦਾ ਗਠਨ ਕਰਕੇ ਮੁੜ ਸਰਕਾਰ ਅਤੇ ਪੁਲਸ ਪ੍ਰਸ਼ਾਸਨ ਵਿਰੁੱਧ ਮੋਰਚਾ ਲਾਇਆ ਜਾਵੇਗਾ।
ਐਕਸ਼ਨ ਕਮੇਟੀ ਦੇ ਕਨਵੀਨਰ ਅਤੇ ਸੀ.ਪੀ.ਆਈ(ਐੱਮ.ਐੱਲ)ਲਿਬਰੇਸ਼ਨ ਦੇ ਬੁਲਾਰੇ ਕਾਮਰੇਡ ਰਾਜਵਿੰਦਰ ਸਿੰਘ ਰਾਣਾ,ਐਂਟੀ ਡਰੱਗ ਟਾਸਕ ਫੋਰਸ ਦੇ ਆਗੂ ਪਰਵਿੰਦਰ ਸਿੰਘ ਝੋਟਾ ਨੇ ਬਾਲ ਭਵਨ ਵਿਖੇ ਹੋਏ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਦੁੱਖ ਜ਼ਾਹਿਰ ਕੀਤਾ ਕਿ ਮਾਨਸਾ ਜ਼ਿਲ੍ਹੇ ਅੰਦਰ ਫਿਰ ਨਸ਼ਿਆਂ ਦੀ ਹਨੇਰੀ ਝੁਲ ਰਹੀ ਹਨ ਅਤੇ ਸਥਾਨਕ ਕਈ ਦੁਕਾਨਦਾਰ ਸ਼ਰੇਆਮ ਨਸ਼ੇ ਵਾਲੀਆਂ ਗੋਲੀਆਂ ਅਤੇ ਹੋਰ ਪਦਾਰਥ ਵੇਚ ਰਹੇ ਹਨ,ਪਰ ਪੁਲਸ ਪ੍ਰਸ਼ਾਸਨ ਫਿਰ ਇਨ੍ਹਾਂ ਦੁਕਾਨਦਾਰਾਂ ਦੀ ਮੱਦਦ ਕਰ ਰਿਹਾ, ਉਨ੍ਹਾਂ ਕਿਹਾ ਕਿ ਹੁਣ ਜਦੋਂ ਉਹ ਪੁਲਸ ਪ੍ਰਸ਼ਾਸਨ ਨੂੰ ਸਬੂਤਾਂ ਸਹਿਤ ਸਬੰਧਤ ਦੁਕਾਨਦਾਰਾਂ ਸਬੰਧੀ ਦੱਸ ਰਹੇ ਹਨ,ਉਨ੍ਹਾਂ ਨੂੰ ਫੜਾਉਣ ਚ ਮਦਦ ਕਰ ਰਹੇ,ਪਰ ਪੁਲਸ ਉਨ੍ਹਾਂ ਨੂੰ ਇਕ ਵਾਰ ਫੜਕੇ ਫਿਰ ਛੱਡ ਦਿੰਦੀ ਹੈ,ਉਨ੍ਹਾਂ ਵਿਰੁੱਧ ਕੋਈ ਵੀ ਪੁਲਸ ਕਾਰਵਾਈ ਨਹੀਂ ਕਰ ਰਹੀ। ਉਨ੍ਹਾਂ ਦੱਸਿਆ ਕਿ ਤਿਨਕੌਣੀ ‘ਤੇ ਇਕ ਦੁਕਾਨਦਾਰ ਸ਼ਰੇਆਮ ਨਸ਼ੇ ਵਾਲੀਆਂ ਗੋਲੀਆਂ ਵੇਚ ਰਿਹਾ ਹੈ,ਹਾਲਾਂਕਿ ਉਸ ਦਾ ਲਾਈਸੰਸ ਡਰੱਗ ਇੰਸਪੈਕਟਰ ਵੱਲ੍ਹੋਂ ਕੈਂਸਲ ਕੀਤਾ ਹੋਇਆ ਹੈ,ਪਰ ਉਹ ਕਿਸੇ ਹੋਰ ਨਾਮ ਅਧੀਨ ਹੁਣ ਨਸ਼ੇ ਵੇਚ ਰਿਹਾ, ਉਸ ਨੂੰ ਪੁਲਸ ਪ੍ਰਸ਼ਾਸਨ ਕੋਲ ਫੜਾਇਆ ਵੀ ਗਿਆ ਸੀ,ਪਰ ਉਸ ਨੂੰ ਸੀਟੀ-2 ਦੇ ਐੱਸ ਐੱਚ ਓ ਨੇ ਇਹ ਦਲੀਲ ਦਿੰਦਿਆਂ ਛੱਡ ਦਿੱਤਾ ਕਿ ਕੋਰਟ ਤੋਂ ਇਸ ਸਬੰਧੀ ਮਨਜੂਰੀ ਲਈ ਜਾਵੇਗੀ,ਹਾਲਾਕਿ ਉਸ ਉਪਰ 420 ਸਮੇਤ ਹੋਰ ਧਰਾਵਾਂ ਸਹਿਤ ਕੇਸ ਬਣਦਾ ਸੀ। ਇਸੇ ਤਰ੍ਹਾਂ ਪਹਿਲਾ ਫੜਿਆ ਗਿਆ ਅਸ਼ਵਨੀ ਮੈਡੀਕਲ ਵਾਲਾ ਦੁਕਾਨਦਾਰ ਫਿਰ ਸ਼ਰੇਆਮ ਨਸ਼ੇ ਵਾਲੀਆ ਗੋਲੀਆਂ ਵੇਚ ਰਿਹਾ ਹੈ। ਪਰ ਪੁਲਸ ਨੇ ਚੁੱਪੀ ਧਾਰੀ ਹੋਈ ਹੈ,ਉਨ੍ਹਾਂ ਪੁਲਸ ਸਟੇਸ਼ਨ ਸਿਟੀ -2 ਨੂੰ ਵੀ ਬਦਲਣ ਦੀ ਮੰਗ ਕੀਤੀ।
ਸ੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਸੀਨੀਅਰ ਬੁਲਾਰੇ ਗੁਰਸੇਵਕ ਸਿੰਘ ਜਵਾਹਰਕੇ ਨੇ ਕਿਹਾ ਕਿ ਹੁਣ ਜਦੋਂ ਨਸ਼ਾ ਵਿਰੋਧੀ ਐਕਸ਼ਨ ਕਮੇਟੀ ਵੱਲ੍ਵੋਂ ਪੁਲਸ ਪ੍ਰਸ਼ਾਸਨ ਦਾ ਸਹਿਯੋਗ ਦਿੱਤਾ ਜਾ ਰਿਹਾ ਹੈ,ਤਾਂ ਉਨ੍ਹਾਂ ਵੱਲ੍ਵੋਂ ਕੋਈ ਗੰਭੀਰਤਾ ਨਹੀਂ ਦਿਖਾਈ ਜਾ ਰਹੀ,ਜਦੋਂ ਨਸ਼ੇ ਵੇਚਣ ਵਾਲੇ ਦੁਕਾਨਦਾਰਾਂ ਵਿਰੁੱਧ ਅੱਕੇ ਹੋਏ ਲੋਕ ਭੜਕਦੇ ਹਨ,ਫਿਰ ਪੁਲਸ ਪ੍ਰਸ਼ਾਸਨ ਦੋਸ਼ ਲਾਉਂਦਾ ਹੈ ਕਿ ਇਹ ਵਿਅਕਤੀ ਕਨੂੰਨ ਆਪਣੇ ਹੱਥ ਚ ਲੈ ਰਹੇ ਹਨ।
ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਨਸ਼ਾ ਵਿਰੋਧੀ ਐਕਸ਼ਨ ਕਮੇਟੀ ਦੇ ਆਗੂ ਗਗਨ ਸ਼ਰਮਾਂ,ਕੁਲਵਿੰਦਰ ਸਿੰਘ ਕਾਲੀਆਂ, ਮੇਜਰ ਸਿੰਘ ਜਮਹੂਰੀ ਕਿਸਾਨ ਸਭਾ, ਮੀਹਾਂ ਸਿੰਘ ਨੇ ਸੰਬੋਧਨ ਕਰਦਿਆਂ ਚਿਤਾਵਨੀ ਦਿੱਤੀ ਕਿ ਜੇਕਰ ਨਸ਼ਿਆਂ ਨੂੰ ਠੱਲ ਪਾਉਣ ਲਈ ਕੋਈ ਕਾਰਵਾਈ ਨਾ ਕੀਤੀ ਗਈ ਤਾਂ ਪੰਜਾਬ ਸਰਕਾਰ ਅਤੇ ਪੁਲਸ ਪ੍ਰਸ਼ਾਸਨ ਵਿਰੁੱਧ ਤਿਖੇ ਮੋਰਚੇ ਤੋਂ ਗਰੇਜ ਨਹੀਂ ਕੀਤਾ ਜਾਵੇਗਾ।
